Ambasada e Shteteve të Bashkuara në Izrael ka pësuar dëmtime nga një breshëri raketash iraniane që goditën Tel Avivin dhe qytetin portual Haifa në orët e para të mëngjesit të së hënës.
Zyrtarët konfirmuan se sulmet kanë shkaktuar vdekjen e të paktën tre civilëve izraelitë dhe plagosjen e dhjetëra të tjerëve, ndërsa përleshja midis Izraelit dhe Iranit po hyn në një fazë të rrezikshme me pasoja të gjera rajonale dhe globale.
Ambasadori amerikan në Izrael, Mike Huckabee, konfirmoi se Ambasada amerikane në Tel Aviv ka pësuar “dëmtime të lehta”, ndërsa 700,000 shtetas amerikanë të pranishëm në Izrael janë paralajmëruar të qëndrojnë në vende të sigurta.
Presidenti i SHBA-së, Donald Trump, u shpreh me tone të ashpra para sulmeve iraniane:
“Nëse ne sulmohemi në çfarëdo forme nga Irani, fuqia e plotë e Forcave të Armatosura të SHBA-së do të bjerë mbi ta në një shkallë që bota nuk e ka parë më parë.”
Ndërkohë, në një zhvillim alarmues, zyrtari i lartë iranian Mohsen Rezaee deklaroi për mediat shtetërore se Teherani po synon të krijojë një “Ushtri Islamike” duke përfshirë Turqinë, Arabinë Saudite, Pakistanin dhe vende të tjera të rajonit, me qëllim të “çrrënjosjes së regjimit zionist”.
“Ne do ta bëjmë Izraelin të pabanueshëm,” tha Rezaee, duke pretenduar gjithashtu se 224 shtetas iranianë janë vrarë dhe më shumë se 1,200 janë plagosur që prej fillimit të sulmeve izraelite të premten.
