Darien Shqina, djali i ish-deputetes Grida Duma dhe i diplomatit të ndjerë Ilir Shqina, ka reaguar publikisht për herë të parë pas ndarjes së parakohshme nga jeta të babait të tij.
Në një mesazh prekës të publikuar në rrjetet sociale, ai ndau me ndjekësit ndjenjat e thella të dhimbjes dhe mungesës së pazëvendësueshme që ka lënë pas babai i tij.
“Ndjej thellë boshllëkun e humbjes tënde fizike, por ti qëndron me mua dhe mbrojtësi im,” shkruan Darien, duke e përshkruar të atin si figurë themelore në formimin e tij personal dhe moral.
Ai thekson se prania e Ilir Shqinës ishte vendimtare në edukimin e tij me vlera, ndershmëri dhe kurajo përballë sfidave të jetës.
Darien tregon se humbja e babait ndodhi në një moment të veçantë: vetëm pak kohë pasi kishte marrë pjesë në ceremoninë mortore të gjyshes së tij. I gjendur jashtë Shqipërisë për studime, ai mori lajmin e rëndë për gjendjen kritike të të atit dhe më pas për ndarjen e tij nga jeta.
Në postimin e tij, ai përshkruan Ilir Shqinën si një njeri me integritet të lartë, që ka shkëlqyer në fushën e diplomacisë dhe ka kontribuar në përfaqësimin ndërkombëtar të Shqipërisë me përkushtim të rrallë.
“Tani je në një vend më të mirë. Nuk detyrohesh më të konsiderosh dakordësi dhe veprime të padrejta, dhe qëndron brenda asaj drejtësie që të karakterizon,” shkruan ai më tej.
