Në një akt guximi të jashtëzakonshëm që ka prekur thellë opinionin publik në Greqi dhe Shqipëri, një emigrant shqiptar, Goga Levian, u hodh në ujërat e rrëmbyeshme të lumit Arakhtos për të shpëtuar dy fëmijë të mitur që po rrezikonin jetën.
Veprimi i tij i, ndonëse i rrezikshëm, i dha atij jo vetëm mirënjohjen e gjithë komunitetit lokal, por edhe një shpërblim të rrallë: ai ka marrë shtetësinë greke si nder për heroizmin.
Ngjarja ndodhi javën e kaluar në Neohori të Artës, kur dy fëmijë u rrëmbyen nga rrjedha e fortë e lumit. Dëshmitarët tregojnë se situata ishte dramatike dhe çastet vendimtare.
Pikërisht në atë moment, Goga Levian – i njohur nga vendasit si “Leo i fshatit” – pa menduar dy herë, ai u hodh në ujë. Pas dy përpjekjesh të pasuksesshme, në përpjekjen e tretë arriti të lokalizonte një nga fëmijët, i cili ishte pa ndjenja.
“Fëmijët. Vetëm ata mendoj,” u shpreh Goga në një bisedë të shkurtër me mediat greke, duke refuzuar çdo lloj lavdie apo vëmendjeje për veten. Me një zë të dridhur, ai shtoi: “Ai fëmijë ishte në moshën e vajzës sime. Nuk kishte rëndësi kush ishin, çfarë etnie apo feje. Unë jam një i huaj, por jam njeri. I bëra atë që do të bënte çdo baba.”
