Prokuroria e Tiranës ka nisur hetim penal pas publikimit në media të një videoje që lidhet me ngjarjen ku humbi jetën i mituri Martin Cani në shkollën “Fan Noli”.
Akuza është për “Zbulim të akteve ose të dhënave sekrete”.
Në video shfaqen të mitur me emrat e tyre të plotë, ndonëse procesi gjyqësor për këtë çështje po zhvillohet me dyer të mbyllura.
Sipas Prokurorisë, publikimi i pamjeve shkel ligjin, sepse ato janë pjesë e provave të gjykimit dhe përmbajnë të dhëna sensitive.
Videoja është identike me një CD që është dorëzuar në dosjen hetimore dhe i është dhënë avokatit të familjes së viktimës me kusht që të mos publikohet.
Hetimet po vazhdojnë për të zbuluar se kush e nxori videon dhe si përfundoi në media.
