Qantas ka njoftuar mbylljen e linjës së saj buxhetore Jetstar Asia, më shumë se dy dekada pas themelimit të saj në Singapor.
Njoftimi u bë zyrtar përmes një deklarate në ASX (Bursa Australiane), ku u theksua se vendimi vjen pas përballjes së Jetstar Asia me kosto në rritje dhe konkurrencë të fortë në rajon.
Jetstar Asia, e cila operonte 16 linja ajrore në Azi dhe ka selinë në Singapor, pritet të shënojë një humbje prej 35 milionë dollarësh këtë vit financiar. Si pasojë, rreth 500 vende pune janë në rrezik.
Jetstar Asia do të vazhdojë operimin deri më 31 korrik, ndërsa pas kësaj date do të ndalojë përfundimisht. Qantas ka premtuar se të gjithë punonjësit e prekur do të përfitojnë pagesa largimi.
Flota e përbërë nga 13 avionë Airbus A320 do të ridrejtohet në rrugë të reja brenda Australisë dhe Zelandës së Re. Ndërkohë, fluturimet e tjera të Jetstar, përfshirë ato brenda Australisë, Zelandës së Re dhe fluturimet drejt/dhe nga Bali e Japonia, nuk do të preken.
Megjithatë, pasagjerët që kanë rezervuar bileta me ndalesa të ndërmjetme përmes Jetstar Asia mund të ndikohen.
CEO e Qantas Group, Vanessa Hudson, tha se shpenzimet e furnizuesve të Jetstar Asia janë rritur me “deri në 200%”, duke e bërë aktivitetin të paqëndrueshëm ekonomikisht. Ajo theksoi se kjo lëvizje do të lirojë rreth 500 milionë dollarë për t’u investuar në rinovimin e flotës së Qantas, përfshirë blerjen e gati 200 avionëve të rinj.
Hudson theksoi se prioriteti i kompanisë është përqendrimi i kapitalit në segmentet më të forta të tregut dhe në iniciativa strategjike si Project Sunrise, që përfshin avionë me rreze ultra të gjatë si Airbus A350-1000ULR – i pari prej të cilëve pritet të mbërrijë në vitin 2026.
Singapori mbetet një nyje kyçe për Qantas Group, duke qenë aeroporti i tretë më i përdorur ndërkombëtarisht nga kompania. Vendimi për të mbyllur Jetstar Asia shënon një tjetër ndryshim të madh në industrinë ajrore të rajonit, pas rënies së transportuesve si Regional Express dhe Bonza në vitet e fundit.
Megjithatë, kërkesa për fluturime – si vendase ashtu edhe ndërkombëtare – vijon të rritet, duke nxitur kompanitë ajrore kryesore të zgjerojnë flotat dhe rrjetin e linjave të tyre.
