Një djalë 16-vjeçar nga Kentucky, SHBA, humbi jetën pas një shantazhi të ashpër online me foto të rreme të tij, të krijuara nga inteligjenca artificiale.
Elijah “Eli” Heacock u vetëvra më 28 shkurt, pak pasi kishte marrë një seri mesazhesh kërcënuese nga një person anonim, i cili i kërkonte 3,000 dollarë në të kundërt do t’i shpërndante foto nudo të supozuara të tij tek familjarët dhe miqtë.
Sipas autoriteteve dhe prindërve të Eli-t, këto foto ishin të gjeneruara me AI dhe nuk ishin reale, por nuk dihet nëse adoleshenti ishte në dijeni të kësaj.
Në momentin që u shtrua në spital për shkak të plagës me armë zjarri, prindërit e tij zbuluan në telefonin e tij një seri mesazhesh kërcënuese dhe e kuptuan se ai kishte qenë viktimë e një skeme sextortion.
“Filluan t’i kërkonin para,” – tha nëna e tij, Shannon Heacock, për News Channel 10. “3,000 dollarë nga një fëmijë… dhe tani ne po përballemi me 30,000 dollarë për shpenzime funerali dhe spitalore.”
Një hetues nga Zyra e Sherifit të Qarkut Barren kontrolloi menjëherë mesazhet në telefon dhe kërkoi që çështja të kalojë në duart e FBI-së, e cila tashmë është përfshirë në hetime.
Çfarë është Sextortion?
Sipas FBI-së, sextortion është një formë shantazhi online ku autorët marrin ose gjenerojnë materiale komprometuese (si foto ose video me përmbajtje seksuale) dhe më pas i përdorin për të kërcënuar viktimën — shpesh për para, shpesh për qëllime të tjera.
Prindërit e Eli-t thonë se nuk kishin dëgjuar më parë për këtë fenomen dhe se nuk e kishin imagjinuar kurrë se fëmija i tyre mund të binte pre e një mashtrimi kaq të sofistikuar.
“Kriminelët nuk kanë nevojë që fotot të jenë të vërteta. Ata mund t’i gjenerojnë me inteligjencë artificiale dhe pastaj t’i përdorin për të shantazhuar fëmijët,” – u shpreh babai i tij, John Burnett.
Ai shtoi se “këta njerëz janë të organizuar, të financuar mirë dhe të pamëshirshëm.”
Një rrezik në rritje për adoleshentët
FBI ka paralajmëruar se rastet e sextortion mes të rinjve janë rritur ndjeshëm, dhe shpesh rezultojnë tragjikisht. Në shumë raste, kërcënuesit publikojnë materialet edhe nëse u jepet shuma që kërkojnë.
Në rastin e Eli-t, nëna e tij tha se kishte parë mesazhe që tregonin se ai kishte dërguar një pjesë të shumës së kërkuar, por përgjigjja nga shantazhuesi kishte qenë: “Nuk mjafton.”
Thirrje për ndërgjegjësim dhe ligje më të forta
Prindërit e Eli-t kanë nisur një fushatë për të rritur ndërgjegjësimin dhe për të kërkuar ligje më të forta që të mbrojnë fëmijët nga krime të tilla digjitale.
“Nuk dua që asnjë nënë tjetër të përjetojë këtë,” – tha Shannon Heacock mes lotëve.
Kujdes për prindërit dhe të rinjtë:
Nëse dikush merr mesazhe kërcënuese ose foto komprometuese, duhet të mos paguajë kurrë, por të njoftojë menjëherë policinë dhe një të rritur të besuar. Këto janë skema kriminale që kërkojnë të përfitojnë përmes frikës.
