Një mësues edukimi fizik ka humbur jetën tragjikisht në Dubai, vetëm 31 vjeç, pasi përdori një ilaç të fuqishëm, të palicencuar në Mbretërinë e Bashkuar, për të trajtuar rënien e flokëve.
Ngjarja u bë publike gjatë një seance gjyqësore hetimore në Wakefield, ku u zbuluan detajet e fundit të jetës së Sam Applegarth, një mësues i dashur dhe i vlerësuar nga komuniteti.
Sam kishte filluar të kërkonte ndihmë për rënien e flokëve që në moshën 22-vjeçare dhe kishte përdorur për vite me radhë trajtime si minoxidil dhe finasteride, pa ndjerë efekte anësore të dukshme.
Në vitin 2017, ai iu nënshtrua edhe një transplanti flokësh me sukses, si dhe trajtimeve me plazmë të pasur me trombocite (PRP) dhe tatuazhit të kokës për të krijuar pamjen e flokëve.
Megjithatë, në vitin 2024, Applegarth nisi të përdorte dutasteride, një ilaç i njohur për trajtimin e prostatës së zgjeruar, por jo i licencuar për rënien e flokëve në MB.
Ai e kishte siguruar vetë online, dhe ky kalim i tij drejt një medikamenti më të fortë nuk ishte i njohur për mjekun e tij specialist në trajtimin e rënies së flokëve, Dr. Bessam Farjo.
Pesë javë pas zhvendosjes së tij në Dubai për një pozicion të ri si mësues, Sam u gjet i pajetë në apartamentin e tij.
Ai nuk kishte lënë asnjë letër lamtumire, dhe analiza pas vdekjes nuk tregoi prani alkooli apo substancash të tjera. As familja dhe as mjeku i tij nuk kishin vënë re ndonjë histori të mëparshme me probleme të shëndetit mendor apo vetëlëndim.
Gjatë seancës, Dr. Farjo deklaroi se efekti anësor “ide vetëvrasëse” është i njohur për finasteride, por jo i raportuar për dutasteride, ndonëse pranoi se ky mund të jetë rezultat i mungesës së raportimit nga pacientët.
E dashura e Sam-it, Anya Guy, e cila planifikonte të zhvendosej te ai në Dubai, tha pas seancës:
“Nëse ka njerëz që përjetojnë mendime vetëvrasëse ndërsa marrin dutasteride, ata duhet t’i raportojnë këto ndjesi. Kjo mund të ndihmojë për të parandaluar tragjedi të tjera si kjo.”
Sam Applegarth ishte i njohur dhe shumë i dashur si trajner sportiv dhe mësues i përkushtuar në Minsthorpe High School.
Ish-rekrutuesi i tij në ekipin e rugby-t në Wakefield Trinity, Craig Shepherd, e përshkroi atë si një “sukses të pashmangshëm në arsim”. Ndërkohë, një prind shkroi në rrjetet sociale:
“Një diamant i vërtetë dhe model për t’u ndjekur. Ai i përfshinte me pasion fëmijët tanë në sport dhe shkonte përtej detyrës.”
