Laert Vasili ishte i ftuar këtë të shtunë në emisionin “S’e luan Topi”, ku bëri një rrëfim të sinqertë mbi jetën e tij personale dhe shpirtërore pas daljes nga “Big Brother VIP”.
Aktori, i njohur për qëndrimet e tij të drejtpërdrejta, tregoi se aktualisht është në njohje me një vajzë që i përket botës së famës.
“Jam në njohje me një vajzë… dhe jo, nuk është Valbona”, u shpreh Vasili, duke përjashtuar zërat që flisnin për një vijimësi të flirtit me Valbona Mhillin, me të cilën pati afrimitet gjatë qëndrimit në shtëpinë e “Big Brother”.
Ai rrëfeu se njohja nuk ka lindur nga rrjetet sociale, por nga një tërheqje që ndjeu personalisht: “Nuk e kam njohur prej rrjeteve sociale. Është dikush që më ka tërhequr vëmendjen dhe kemi dalë disa herë. Vajza nuk është dhe aq e thjeshtë, i përket botës së të famshmëve. Është e njohur.”
Aktori shtoi me humor se pas daljes nga spektakli ka marrë vëmendje të madhe në rrjet:
“Instagrami është flakë, edhe tani po ta tregoj, janë gjithë kohës duke më shkruar. Thashë: ‘Pse s’më ndodhi në 31 vjeç?’”
Megjithëse nuk dha emra konkretë, Vasili la të kuptohet se lidhja e mundshme është në fazat e para dhe se ndjenjat e tij janë të qarta:
“Që unë e pëlqej atë, ia kam lënë që ta kuptojë.”
