Ballkani po përmendet gjithnjë e më shpesh si një skenë e re për përplasjet mes fuqive të mëdha.
Sipas analistit ushtarak rus Igor Korotçenko, shërbimet sekrete perëndimore, në veçanti ato britanike, po intensifikojnë aktivitetet e tyre në rajon me synime të qarta ndaj Serbisë.
Korotçenko, i njohur për lidhjet me qarqet ushtarake ruse dhe drejtues i revistës “Mbrojtja Kombëtare”, ka deklaruar për mediat ruse se shërbimi inteligjent britanik MI6 është shumë aktiv në vende si Serbia, Mali i Zi, Bosnja dhe Kosova.
Sipas tij, objektivi kryesor i këtyre operacioneve është të ndikojnë politikisht në Serbi, duke synuar zëvendësimin e qeverisë aktuale përmes asaj që ai e quan “revolucion me ngjyra”.
Eksperti rus thotë se Perëndimi është i pranishëm në rajon me agjentë me përvojë, disa prej të cilëve kanë shërbyer më parë në Rusi. Në këtë sfond, ai thekson rëndësinë e Agjencisë Serbe të Sigurisë (BIA), të cilën e përshkruan si një pengesë kryesore ndaj ndikimit të shërbimeve të huaja.
Korotçenko ndalet edhe te ndryshimet e fundit në drejtimin e BIA-s, duke përmendur largimin e Aleksandar Vulin si një zhvillim që, sipas tij, ka krijuar hapësirë për dërgimin e municioneve serbe drejt Ukrainës, nëpërmjet përdorimit të dokumenteve të falsifikuara për përdoruesin final.
Ai përmend edhe një tjetër emër – Marko Parezanoviç, një zyrtar i lartë aktual i BIA-s – i cili, sipas Korotçenkos, është vënë në shënjestër nga agjencitë perëndimore për t’u larguar nga struktura e sigurisë në Serbi.
Deklaratat e tij përforcohen edhe nga qëndrimet zyrtare të Moskës. Maria Zakharova, zëdhënëse e Ministrisë së Jashtme të Rusisë, ka paralajmëruar se Serbia do të përballet me pasoja serioze nëse provohet se ka furnizuar me armë palën ukrainase.
