Një ngjarje tejet tronditëse ka ndodhur në Michigan, ku një djalë 10-vjeçar ka humbur jetën në rrethana të rënda.
Sipas mediave lokale dhe dokumenteve të gjykatës, fëmija u shtyp për vdekje nga nëna e tij kujdestare, e cila peshonte rreth 340 paund (rreth 154 kg), pasi sipas saj, djali po sillej keq. E dyshuara, Jennifer Wilson, raportohet se ka qëndruar ulur mbi trupin e fëmijës për afro 5 minuta, duke e lënë atë pa frymë dhe pa mundësi për të lëvizur.
Ngjarja nisi kur 10-vjeçari, i cili peshonte vetëm 91 paund (rreth 41 kg), u largua nga shtëpia dhe u fsheh në oborrin e fqinjëve.
Më pas, kur u rikthye, siç rrëfen vetë Wilson në deklaratat për policinë, ajo e uli në tokë dhe e shtypi me trupin e saj ndërkohë që po telefononte punonjësen sociale të çështjes.
Ndërkohë që djali bërtiste nga dhimbjet, sipas dokumenteve të siguruara nga “Express US”, ai papritmas pushoi së lëvizuri. Gruaja deklaroi se fillimisht mendoi se ai po shtirej, por shpejt e kuptoi seriozitetin e situatës kur pa që sytë e tij ishin zbehur dhe ai nuk reagonte më.
Pasi e rrokullisi trupin e fëmijës, vërejti se ai nuk kishte puls. Pavarësisht përpjekjeve për të kërkuar ndihmë mjekësore, fëmija u shpall i vdekur në vendngjarje.
Autoritetet po vazhdojnë hetimet dhe pritet që Jennifer Wilson të përballet me akuza të rënda për vrasje apo neglizhencë të rëndë me pasojë vdekjen.
