Autoritetet shqiptare kanë konfirmuar rastin e parë të murtajës së ruminantëve të vegjël (PPR) në vend, një sëmundje ngjitëse që prek kafshët e imta, si delet dhe dhitë.
Rasti është identifikuar në një fermë mbarështimi të caprinëve në njësinë administrative Postribë, në qarkun Shkodër.
Mostrat e marra nga Shërbimi Veterinar në terren janë analizuar në laboratorin referencë të Institutit të Sigurisë Ushqimore dhe Veterinarisë (ISUV), i cili ka konfirmuar praninë e virusit PPR.
Menjëherë pas verifikimit të rastit, janë zbatuar të gjitha masat e parashikuara nga legjislacioni përkatës dhe Plani Kombëtar i Kontigjencës për PPR, për të kontrolluar dhe menaxhuar situatën në terren.
Autoritetet veterinare u bëjnë thirrje të gjithë fermerëve dhe mbarështuesve të kafshëve të imta që të respektojnë masat parandaluese dhe të kufizojnë çdo lëvizje të kafshëve brenda dhe jashtë fermave.
Në rast se vërehen simptoma të dyshimta si: temperaturë e lartë, rrjedhje nga hunda, inflamacion i syve, ulje e oreksit, diarre ose ngordhje e papritur, këshillohet që të njoftohet menjëherë Shërbimi Veterinar Rajonal ose të kontaktohet numri falas 0800 3366.
Sqarim për publikun: Nuk ka rrezik për shëndetin e njeriut
Në njoftimin zyrtar theksohet se murtaja e ruminantëve të vegjël nuk është një sëmundje zoonotike, pra nuk transmetohet tek njerëzit dhe nuk paraqet asnjë rrezik për shëndetin publik. Megjithatë, përhapja e saj mes kafshëve paraqet sfidë për sektorin bujqësor dhe mirëqenien e blegtorëve.
Autoriteti Kombëtar i Veterinarisë dhe Mbrojtjes së Bimëve, në bashkëpunim me strukturat përkatëse lokale dhe kombëtare, njofton se do të vijojë ndjekjen e situatës me vëmendje dhe do të informojë publikun në mënyrë të rregullt për çdo zhvillim të mëtejshëm.
