Një tërmet me magnitudë 5.8 të shkallës Rihter goditi në orët e para të mëngjesit zonën detare midis ishullit të Rodosit në Greqi dhe bregdetit perëndimor të Turqisë, duke shkaktuar frikë dhe dëme materiale në disa qytete.
Sipas Shërbimit Gjeodinamik të Athinës, tërmeti u regjistrua rreth orës 02:17 të mëngjesit dhe kishte thellësi prej rreth 10 km.
Lëkundjet u ndjenë gjerësisht në Rodos, ku banorët dhe turistët dolën jashtë hoteleve dhe banesave në përpjekje për të gjetur siguri.
Autoritetet greke kanë konfirmuar se nuk ka raportime për viktima apo të plagosur në Greqi, ndërsa dëmet janë të kufizuara kryesisht në infrastrukturë të lehtë dhe mure të çara në ndërtesa të vjetra.
Ndërkohë, situata paraqitet më e rënduar në Turqi, ku tërmeti është ndjerë në qytete si Izmir, Antalia, Mugla dhe Manisa.
Ministria e Shëndetësisë turke njoftoi se një vajzë 14-vjeçare humbi jetën si pasojë e një sulmi paniku, ndërsa 69 persona të tjerë janë plagosur – shumica prej tyre nga kërcime nga ballkone dhe dritare në përpjekje për të shpëtuar.
Pamje të publikuara nga mediat turke dhe rrjetet sociale tregojnë momentet e panikut, me njerëz që largohen me shpejtësi nga ndërtesat dhe kërkojnë hapësira të hapura.
Në disa raste, janë regjistruar video ku individë hidhen nga katet e ulëta të ndërtesave nga frika e shembjes.
Ministri i Brendshëm i Turqisë, Ali Yerlikaya, ka shprehur ngushëllimet për familjen e viktimës dhe u ka uruar shërim të shpejtë të plagosurve. Ai ka njoftuar se ekipet e emergjencës janë në terren për të vlerësuar dëmet dhe për të siguruar mbështetje për të prekurit.
Aktualisht, autoritetet në të dy vendet vazhdojnë inspektimet në ndërtesa për të garantuar sigurinë publike, ndërsa qytetarëve u është bërë thirrje të qëndrojnë të kujdesshëm për lëkundje pasuese.
