Skandali që ka shpërthyer ditët e sotme lidhur me aktorin Elvis Pupa dhe bashkëshorten e tij Belina, të akuzuar për kultivim të kanabisit në Australi, ka tërhequr vëmendje të madhe, jo vetëm për natyrën e akuzave, por edhe për kontrastin e fortë me imazhin publik të çiftit.
Sipas mediave australiane, një ‘shtëpi bari’ është zbuluar në pronën e tyre në Adelaide, ku dyshohet se kultivohej një sasi e konsiderueshme kanabisi dhe kishte ndërhyrje të paligjshme në rrjetin e energjisë.
Belina Pupa, një influencuese dhe terapiste e njohur atje, tashmë përballet me drejtësinë, ndërsa Elvis Pupa është larguar nga vendi dhe është shpallur në kërkim.
Ironikisht, vetëm pak kohë më parë, Vis Pupa ishte aktiv në rrjetet sociale, duke shpërndarë video të qeta dhe paqësore nga shtëpia e tij, ku së bashku me bashkëshorten shfaqeshin duke mbjellë pemë në kopsht.
Në një prej postimeve, ai shkruante:
“Kjo është mënyra jonë për të pastruar mendjen dhe shpirtin nga programet televizive. Mos më pyesni ‘ku ke humbur’, se ja ku jam – duke mbjellë jetë.”
Por ky mesazh që dikur u duk si një thirrje për thjeshtësi dhe jetë të pastër, sot rikthehet në vëmendje me një domethënie ironike, pas akuzave serioze që rëndojnë mbi çiftin.
