Një studim i ri i Universitetit të Yale ka ngritur shqetësime serioze mbi efektet afatgjata të vaksinave kundër COVID-19, duke identifikuar një gjendje të re shëndetësore të quajtur “Sindroma Post-Vaksinim” (PVS).
Kjo sindromë, sipas studiuesve, shfaq simptoma të rënda fizike dhe neurologjike që mund të zgjasin për vite, në rastin më të keq përjetësisht, pas marrjes së vaksinës.
Studimi u bazua në analiza të mostrave të gjakut nga 42 pacientë që kishin zhvilluar simptoma të zgjatura pas vaksinimit, krahasuar me 22 persona të tjerë të vaksinuar pa shenja të tilla.
Rezultatet ishin domethënëse: pacientët me PVS kishin nivele të larta të proteinës spike të virusit SARS-CoV-2 në organizëm edhe pas një kohe të gjatë, si dhe ndryshime të theksuara në sistemin e tyre imunitar. Po ashtu, tek të dy grupet u zbulua riaktivizim i virusit Epstein-Barr – një virus që shumica e njerëzve e mbartin në mënyrë latente, por që mund të shkaktojë simptoma të ngjashme me gripin kur reaktivizohet.
Një ndër rastet më të përfolura është ai i Sascha Schwartz, 32 vjeç, nga Gjermania, e cila raportoi marramendje, mjegull mendore, dhimbje koke dhe lodhje ekstreme pas marrjes së vaksinës AstraZeneca. Ajo u refuzua nga mjekët për muaj me radhë, deri kur një imunolog e mori seriozisht dhe konfirmoi lidhjen me vaksinën.
Në Britaninë e Madhe, rasti i Jamie Scott, i cili pësoi dëmtime të përhershme në tru si pasojë e një gjendjeje të rrallë të quajtur VITT (Trombocitopenia me trombozë e induktuar nga vaksina), çoi në një padi ndaj kompanisë AstraZeneca. Në shkurt të vitit 2024, kompania e pranoi publikisht se vaksina e saj mund të shkaktojë këtë sëmundje “në raste shumë të rralla”.
Bashkautori i studimit, Dr. Harlan Krumholz, theksoi rëndësinë e dëgjimit të pacientëve që raportojnë probleme serioze pas vaksinimit:
“Është e qartë se disa persona po përballen me sfida reale dhe serioze. Detyra jonë është t’i marrim ata seriozisht, jo t’i etiketojmë apo t’i injorojmë,” tha ai.
Nga ana tjetër, Ministri britanik i Shëndetësisë, Wes Streeting, është angazhuar për të reformuar skemën e dëmshpërblimeve për ata që kanë pësuar pasoja nga vaksinat kundër COVID-19.
Ky studim nuk synon të minimizojë rolin e vaksinave në luftën kundër pandemisë, por nënvizon nevojën për transparencë, kujdes afatgjatë dhe një qasje më të ndjeshme ndaj atyre që mund të kenë përjetuar efekte të padëshiruara.
