Konflikti me armë që tronditi Laçin ka marrë një kthesë të re pas dëshmisë paraprake të 28-vjeçarit Klevis Ndreca, i cili dyshohet se ka qëlluar i pari në përplasjen me të rinjtë e tjerë.
Në deklaratën e tij përpara hetuesve, Ndreca ka thënë se u ndje i kërcënuar dhe prandaj reagoi me armë.
“I pashë që kishin armë dhe mendova se do më godisnin. U tremba dhe qëllova,” ka thënë ai gjatë marrjes në pyetje.
Në momentin e përplasjes, Ndreca ndodhej në makinë me Amarildo Ndojn (26 vjeç), ndërsa pala tjetër përbëhej nga Daniel Gjeloshi, Liridon Ismailaj dhe Gerald Bitri – ky i fundit, vetëm 24 vjeç, ndërroi jetë sot në Spitalin e Traumës si pasojë e plagëve të marra.
Pas ngjarjes, Ndreca është larguar në këmbë nga vendngjarja dhe më pas është vetëdorëzuar në polici. Sipas burimeve zyrtare, ai është lokalizuar nga efektivët përmes kontrollit të zonës me dron, dhe pasi u rrethua, vendosi të dorëzohej bashkë me armën e përdorur në krim.
Hetimet për ngjarjen vijojnë, ndërsa policia po punon për të zbardhur të plotë motivet dhe dinamiken e konfliktit që përfundoi me viktimë.
