Autoritetet në Mianmar kanë arrestuar astrologun John Moe The, pasi një video e tij virale në TikTok ku parashikonte një tërmet të ri shkaktoi frikë dhe panik masiv në vend.
Parashikimi u publikua më 9 prill, vetëm dy javë pas një tërmeti katastrofik me magnitudë 7.7 që vrau mbi 3,500 persona dhe shkatërroi tempuj historikë në këtë shtet të Azisë Juglindore.
Ministria e Informacionit e Mianmarit bëri të ditur se John Moe The u arrestua të martën për “bërje deklaratash të rreme me qëllim shkaktimin e panikut publik”.
Në videon e tij, e cila u pa më shumë se tre milionë herë në TikTok, ai paralajmëronte se më 21 prill një tërmet do të “godiste çdo qytet në Mianmar”.
Ai i këshillonte njerëzit të “merrnin gjëra të rëndësishme me vete dhe të iknin nga ndërtesat gjatë lëkundjeve”. Në mbishkrimin e videos, thuhej: “Njerëzit nuk duhet të qëndrojnë në ndërtesa të larta gjatë ditës”.
Shumë qytetarë i morën seriozisht paralajmërimet e tij. Një banore e Yangon-it tha për AFP se fqinjët e saj nuk pranuan të flinin në shtëpitë e tyre atë ditë, duke ngritur kampe jashtë për të shmangur rrezikun nga tërmeti i paralajmëruar.
Ekspertët kanë theksuar se parashikimi i saktë i tërmeteve është i pamundur, për shkak të kompleksitetit të faktorëve që i shkaktojnë ato.
Sidoqoftë, llogaria e John Moe The në TikTok – tashmë e mbyllur – kishte mbi 300,000 ndjekës dhe pretendonte se bënte parashikime përmes astrologjisë dhe fallxhorisë.
Ai u arrestua gjatë një bastisjeje në shtëpinë e tij në rajonin qendror të Sagaing, një nga zonat më të goditura nga tërmeti i 28 marsit.
