Hetimet për vrasjen e studentes shqiptare Ilaria Sula kanë marrë një kthesë të re dhe të papritur.
Sipas raportimeve të gazetës italiane La Repubblica, gjurmë ADN-je që i përkasin një burri janë zbuluar në valixhen ku ndodhej trupi i pajetë i 22-vjeçares, i cili u hodh në një zonë pyjore pranë Romës.
Kjo zbulon një pistë të re hetimi dhe vëmendja tashmë është përqendruar tek babai i Mark Antony Samson, i dashuri filipinas i Ilarias dhe autori i dyshuar i krimit.
Megjithëse ai nuk është aktualisht nën hetim, prokurorët italianë nuk e përjashtojnë mundësinë që ai të ketë pasur dijeni apo përfshirje indirekte në ngjarje.
Sipas dëshmisë së nënës së Samson, bashkëshorti i saj nuk ndodhej në banesë kur ndodhi vrasja, por ajo vetë pranoi se ndihmoi të birin të fshihte gjurmët e gjakut pas aktit makabër.
Tashmë pritet që babai i Mark Samson të merret sërish në pyetje, ndërsa ekspertët do të analizojnë nëse profili i tij gjenetik përputhet me ADN-në e gjetur në valixhe.
Ky zhvillim rrit dyshimet për një përfshirje më të gjerë në fshehjen e krimit dhe lë vend për një hetim më të thelluar mbi rolin që mund të kenë luajtur të afërmit e autorit pas vrasjes.
