Në studion e “Top Story”, mbrëmjen e sotme ishte e pranishme nëna e Martinit, e cila mes lotëve dhe dhimbjes së madhe, tregoi se familja e autorit nuk i ka kërkuar ende një falje për tragjedinë që i ka ndodhur djalit të saj.
Duke folur me zërin që i dridhej, ajo shprehu zhgënjimin e saj jo vetëm për mungesën e një gjesti nga familja e autorit, por edhe për mënyrën se si shkolla e ka trajtuar situatën.
“E vetmja gjë që ka bërë shkolla, është që më ka hequr nga grupi i WhatsApp-it,” tha ajo, duke theksuar se nuk i është ofruar asnjë ndihmë psikologjike pas kësaj humbjeje të rëndë.
Ajo kërkon që autori të marrë dënimin e merituar dhe që të gjithë ata që nuk parandaluan këtë tragjedi të mbajnë përgjegjësi. “Familja e Marios nuk na kanë kërkuar falje, me gjithë atë dhimbje që na ra, që të thonë si të bëjmë që na ra në kjo fatkeqësi, se ai e ka në jetë fëmijën e tij, ndërsa unë jo, dhe kërkojnë dhe ulje dënimi” u shpreh ajo e revoltuar.
Nëna e viktimës gjithashtu ngriti shqetësime për mënyrën se si shkolla trajtoi situatën mes fëmijëve. “Nuk na është ofruar asnjë ndihmë, asnjë psikolog. Besoj se mes atyre fëmijëve është pakujdesia te shkolla, sepse nëse në shkollë zihen dy fëmijë, patjetër duhet njoftuar prindi. Të më kishin marrë në telefon mua unë isha aq e ndërgjegjshme që të mos kërkoja llogari dhe do e mbaja peshën vete.”
Në fund, ajo theksoi se nuk do të ndalet në kërkimin e drejtësisë për djalin e saj. “Dua të marrë gjithsesi atë që meriton. Se të mos jetë kështu, unë nuk vij këtu”.
