Ngjarja tragjike e vrasjes së 22-vjeçares shqiptare, Ilaria Sula, ka tronditur familjen e saj, e cila ka kërkuar drejtësi dhe ka ndarë momentet e dhimbshme të zhdukjes së saj.
E ëma dhe vëllai i viktimës kanë dhënë dëshmi të ndjera për atë që ndodhi në ditët para se trupi i saj të gjendej në një zonë të pyllëzuar në Itali.
Dëshmia e nënës: “E kuptova menjëherë që diçka nuk shkonte”
Nëna e viktimës, Gëzime Sula, ka rrëfyer se dyshimet e saj nisën menjëherë pasi vajza nuk po i përgjigjej në telefon dhe në vend të thirrjeve, ajo merrte vetëm mesazhe.
“Menjëherë e kuptova se diçka nuk shkonte. Më pas fola me miqtë që jetonin me të dhe së bashku me bashkëshortin vendosëm të denoncojmë menjëherë zhdukjen e saj, falë edhe inspektorit Moreno Fernandez që më rekomandoi një mik nga Terni. E di që hetimet çuan menjëherë te djali me të cilin Ilaria kishte dalë në të kaluarën, por ne dimë pak për të,” ka thënë ajo për mediat italiane.
Dëshmia e vëllait: “Ilaria ishte e qetë, por më pas vetëm mesazhe…”
Vëllai i viktimës ka rrëfyer se ai kishte komunikuar me të motrën dy javë më parë, gjatë një vizite të saj në familje. Ai ka shprehur dyshimet e tij për mesazhet që mori më pas nga telefoni i Ilarias, duke dyshuar se ato nuk ishin shkruar prej saj.
“Me Ilarian fola për herë të fundit dy javë më parë, sepse ajo erdhi të na vizitojë në Terni. Ajo ishte e qetë dhe nuk më tregoi për asnjë problem, pastaj vetëm mesazhe, por nuk jam i sigurt që i kishte shkruar. E njihja, ishin bashkë prej një viti, por ishin ndarë prej kohësh,” ka treguar ai.
Kërkesa për drejtësi
Familja e viktimës është e shkatërruar nga kjo humbje tragjike dhe kërkon që drejtësia të vihet në vend sa më shpejt. Ata shpresojnë që autori të marrë dënimin maksimal për këtë krim të rëndë që ka shokuar komunitetin shqiptar dhe atë italian.
Hetimet për zbardhjen e plotë të rrethanave të vrasjes vazhdojnë, ndërsa autoritetet italiane po punojnë për të gjetur edhe telefonin e viktimës, një provë kyçe që mund të ndihmojë në sqarimin e mëtejshëm të ngjarjes.
