Një ngjarje e rëndë ka tronditur Italinë dhe Shqipërinë, ku e reja shqiptare, Ilaria Sula, u gjet e vrarë në një mënyrë makabre.
Pas identifikimit të autorit dhe arrestimit të tij, familjarët e viktimës kanë ndarë dhimbjen dhe dëshminë e tyre për këtë tragjedi.
Në një intervistë për emisionin italian “Chi l’ha Visto?”, Flamur Sula, babai i Ilaria Sula-s, ndau momentet e fundit të komunikimit me të bijën dhe takimin e tij me autorin.
“Hera e fundit që kemi dëgjuar Ilarian ishte të martën dhe na tha se do të kthehej në shtëpi të shtunën,” ka treguar ai. “Ajo jetonte me shoqet në Romë, ku studionte. Pas kësaj telefonate, kemi marrë vetëm mesazhe nga telefoni i saj. Ishte sikur ajo po shkruante: ‘Ciao, babi, mos u shqetëso. Jam mirë. Jam larguar me një djalë dhe një vajzë. Do të kthehem në Terni pas një muaji’.”
Por familja dyshoi menjëherë se diçka nuk shkonte. “Ajo shkruante ‘mos u shqetëso, jam mirë’. Kjo gjë na ngriti dyshime. Nëse do të kishte qenë vërtet vajza ime, do të më kishte telefonuar. Të shtunën shkuam të bënim denoncimin për zhdukjen e saj,” ka rrëfyer babai i viktimës.
Një detaj tronditës nga dëshmia e Flamur Sula-s është edhe takimi me Mark Samsonin, autorin e dyshuar të vrasjes.
“Të dielën, në komisariat, takuam Mark Samsonin, djalin e vajzës sime. Nuk e dinim që ishin ndarë. Ai na tha se i vinte shumë keq dhe se ishte i shqetësuar për zhdukjen e saj. Dukej i qetë, madje më përqafoi.”
