Një ngjarje e rëndë ka tronditur Romën, por edhe Shqipërinë, këtë të mërkurë.
Ilaria Sula, një 22-vjeçare shqiptare, është vrarë në mënyrë makabre nga i dashuri i saj, i cili është identifikuar nga autoritetet italiane si Mark Samson, 23 vjeç.
Dinamika e krimit
E reja shqiptare ishte një studente, e cila ndante banesën ku jetonte me të tjera vajza. Ajo ishte larguar nga shtëpia më 25 mars, por trupi i saj u gjet këtë të mërkurë. Pasi ishte vrarë, viktima ishte futur në një valixhe e më pas ishte hedhur në një zonë të pyllëzuar.
Si ra policia në gjurmët e autorit
Autori dyshohet të ketë përdorur një thikë për të vrarë të renë, të cilën më pas e futi në valixhe dhe e hodhi në zonën e pyllëzuar. Pas humbjes së kontakteve, familja e vajzës është alarmuar dhe ka kërkuar ndihmën e policisë për ta gjetur atë.
Ngjarja u zbardh falë tabulateve të telefonit të viktimës, i cili ishte mbajtur nga autori. Ky i fundit postonte herë pas here në rrjete sociale, duke u shtirur sikur ishte viktima. Po ashtu, ai i ka nisur edhe familjarëve të viktimës disa mesazhe sikur ishte ajo, në mënyrë që të mos dyshonin. Më tej, ai mësohet se e ka hedhur telefonin në një pusetë.
Ndonëse familjarët e denoncuan rastin që mbrëmjen e 25 marsit, ku e reja nuk u kthye më në shtëpi, policia mundi të gjente trupin vetëm 8 ditë më pas. Pas gjetjes së trupit, policia ka bërë të mundur, me ndihmën edhe të tabulateve telefonike, identifikimin dhe arrestimin e autorit.
Akuzat që rëndojnë ndaj autorit
Ngjarja është ende nën hetim, pasi ende nuk është gjetur telefoni i të resë, ndërsa hetuesit po punojnë për të zbardhur dinamikës e plotë të krimit. Megjithatë, deri më tani, autori akuzohet për veprat penale “vrasje me dashje” dhe “fshehje e kufomës”.
Burimi: Corriere Della Sera, Anabel.al
