Dasmat kanë qenë gjithmonë raste gëzimi dhe argëtimi për të gjithë, duke përfshirë edhe fëmijët, të cilët me pafajësinë e tyre sjellin një atmosferë të veçantë në çdo festë.
Megjithatë, një tendencë e re po përhapet gjithnjë e më shumë në dasmat e kohëve të fundit: shumë çifte preferojnë të mos kenë fëmijë të pranishëm në ceremoninë e tyre dhe e shkruajnë këtë kërkesë qartë edhe në ftesat e dasmës.
Një rast i tillë është ai i çiftit të njohur në TikTok, Lirimi dhe Elona, të cilët u martuan këtë verë. Ata vendosën të mos kenë fëmijë të pranishëm në dasmën e tyre dhe e bënë këtë kërkesë publikisht. Megjithatë, një pjesë e të ftuarve nuk iu përmbajtën kësaj kërkese dhe morën fëmijët me vete në dasmë.
Çifti e konsideroi këtë situatë si një “rregull të thyer”, duke shprehur zhgënjimin e tyre që disa nga të ftuarit nuk respektuan dëshirën e tyre për një dasmë “pa fëmijë.”
Kjo tendencë e re ka ngjallur diskutime të shumta mbi rolin e fëmijëve në dasma dhe respektimin e dëshirave të çiftit që martohet, duke sjellë një debat të ri kulturor në lidhje me traditat e dasmave.
