Sulmuesi hungarez Barnabas Varga ndodhet në gjendje të mirë e të qëndrueshme në spital pas incidentit që i ndodhi në fushë gjatë fitores së Hungarisë ndaj Skocisë në ‘Euro2024’.
Sulmuesi ra pa ndjenja në fushë pasi u përplas me portierin skocez Angus Gunn në pjesën e dytë në Shtutgart. Lojtarët e Hungarisë sinjalizuan shpejt se Varga kishte nevojë për ndërhyrje mjekësore.
Pas më shumë se gjashtë minutash trajtim, Varga u largua nga fusha me barelë. Menjëherë pas fitores 1-0 të Hungarisë me kohë të plotë, Federata e Futbollit të Hungarisë konfirmoi se 29-vjeçari ishte në gjendje stabël.
Në një deklaratë nga Federata Hungareze e Futbollit thuhej: “Gjendja e Barnabas Varga është stabile. Lojtari i Ferencvaros aktualisht ndodhet në një nga spitalet e Shtutgartit. Ne do t’ju informojmë menjëherë nëse ka ndonjë lajm për gjendjen e tij.”
Trajneri i Hungarisë, Marco Rossi, tha: “Ajo që dëgjova nga lojtarët ishte se ai ra pa ndjenja, dhe të gjithë ishin shumë të shqetësuar për gjendjen e tij, dhe fakti që mjekët mbërritën pak me vonesë. Ata ndoshta nuk e kuptuan se ishte një situatë e rrezikshme.
“Tani mund të themi se Varga nuk është në asnjë lloj rreziku, ndoshta do t’i nënshtrohet një operacioni në 48 orët e ardhshme, ka pësuar një frakturë në faqe. Por është mirë dhe kjo është gjëja më e rëndësishme.
