Kryeministrja e Italisë, Giorgia Meloni, ka kërkuar 100 mijë euro dëmshpërblim pas publikimit online të videove pornografike me imazhin e rremë të saj. Meloni pritet të dëshmojë në një gjykatë në qytetin Sardinian të Sassarit, më 2 korrik.
Imazhet e rreme janë ato kur fytyra e një personi shtohet në mënyrë digjitale në trupin e një personi tjetër. Një burrë 40-vjeçar i cili mendohet se i ka krijuar videot dhe babai i tij 73 vjeç, janë vënë nën hetim. Policia ka thënë se ka arritur t’i gjejë ata duke gjurmuar pajisjen celulare që është përdorur për postimin e videove.
Hetimi filloi në vitin 2020 në qytetin e Sassarit. Ata akuzohen se kanë përdorur softuer video për t’i bërë aktoret pornografike të duken si Meloni. Sipas hetuesve, filmat ishin të disponueshëm në internet për muaj të tërë përmes një faqe interneti në SHBA dhe gjithashtu u panë miliona herë.
Të dy burrat po akuzohen për shpifje. Sipas ligjeve italiane, rastet e shpifjeve konsiderohen krim dhe dënohen me burgim. Sipas aktakuzës, videot janë postuar në website amerikane të pornografisë, dhe ato janë shikuar “miliona herë”.
Ankesa e kryeministres thoshte se ajo donte t’u dërgonte një mesazh “të gjitha grave që janë viktima të këtij lloj abuzimi me pushtetin, të mos kenë frikë të ngrenë akuza”.
