“X Factor Albania” do të startojë shumë shpejt në Tv Klan për të zbuluar talentet më të reja muzikore.
Skenaristja e “X Factor” Ilda Lumani e ftuar ditën e djeshme në ‘Klan News’ ndau disa risi lidhur me programin.
Mes detajeve lidhur me spektaklin Lumani ka folur edhe për jurinë e këtij spektakli aq shumë e komentuar ditët e fundit, ku ka thënë se të konfirmuar janë tre prej tyre të cilët janë Adi Krasta, Arilena Ara dhe Elhaida Dani.
E pyetur nëse do të jetë një prej anëtarëve të katërt të jurisë edhe këngëtari Ylli Limani, skenaristja e “X Factor” nuk e ka mohuar një gjë të tillë.
“Deri diku, çfarë ju dini sepse janë shumë emra dhe juria është shumë pak. Në fakt ne këto ditë edhe sot madje kemi audicione. Pas audicioneve të produksioneve, të gjithë konkurrentët kanë kaluar përmes një filtri nga Vocal Coach që janë tre artistë shumë të mirë Landi Kademi, Kamela Islamaj, Egzona Ademi. Tre artistë të cilët i kanë përgatitur për daljen dhe do të jenë pjesë e produksionit. Pas kësaj site që u është bërë ata dalin para audiocioneve të jurisë, të cilët tashmë i kanë këta konkurentë më të përgatitur dhe janë gati për të performuar si artistë të vërtetë. Në momentin që këta artistë kanë dalë para jurisë atëherë kemi audicione zyrtare të cilat po regjistrohen dhe do të bëhen në televizionin Klan gjatë muajit dhjetor.”
Ndër të tjera Lumani ka shtuar se këtë vit tre kategoritë për të përzgjedhurit do të jenë kategoria e ‘vajzave’, ‘djemve’ dhe kategoria ‘mix’ ku është hequr kategoria ‘grup’ sepse është parë që nuk ka funksionuar pasi grupet janë krijuar për spektaklin dhe më pas janë shpërbërë.
“Këtë vit do të jenë të ndarë ndryshe nga vitet e tjera. Tashmë të përzgjedhurit ndahen sipas kategorive që do të jenë një kategori për vajzat një për djemt dhe një kategori mix. Këto tre kategori janë risia që ndryshe nga vitet e kaluara është hequr kategoria grup sepse edhe në “X Factor” nëpër botë është parë që nuk ka funksionuar sepse kanë qenë grupe që janë krijuar për hir të spektaklit dhe më pas shpërbëhen. Shumë pak kanë funksionuar edhe ne prandaj nuk e kemi përfshirë kategorinë ‘grup’.”
