Pas përfundimit të rrugëtimit të tij në “Big Brother VIP 2” ku arriti të shkojë në finale dhe të përballet ‘kokë më kokë’ me Luiz Ejllin, Krist Aliaj nuk i ka munguar ndjekësve të tij pasi menjëherë u shfaq me një projekt të ri televiziv.
Ai u bë pjesë e emisionit “She’s On Top”, spektakël i cili sapo ka përfunduar dhe Kristi ishte pjesë e jurisë profesioniste që gjykonte vajzat.
Por jo vetëm kaq, pasi ish-banori i shtëpisë më të famshme në Shqipëri është mjaft aktiv në rrjetet e tij sociale. Ai herë pas here bën bashkëbisedime virtuale me ndjekësit e tij si dhe ndan me to momente të ndryshme nga përditshmëria.
Ditën e sotme Kristi ka ripostuar një video kur ai ishte pjesë e “Big Brother VIP”. Në videon në fjalë, ai shfaqet krah Luizit teksa këndon një këngë të Sabianit, “Tullaci”.
Në atë kohë, Kristi sapo kishte nisur një romancë me vajzën e këngëtarit, Keisi Medini, dhe Luizi herë pas here i ngacmonte ata. Në pamjet e postuara në “Instastory” shfaqet gjithashtu edhe Sabiani dhe të gjithë po këndojnë e kërcejnë.
Ndërkohë Kristi bashkëngjitur me videon në fjalë shkruan:
“Edhe pse ndonjëherë ishte absurde dhe e çuditshme – u argëtova shumë atje – si ky moment për shembull”.
Kujtojmë se lidhja e Kristit me Keisin përfundoi po brenda shtëpisë së BB VIP.
