Të gjithë u entuzizmuan shumë në 2019 kur mësuan se dy nga reperët më të mirë shqiptarë, Mozzik dhe Unikkatil, kishin bashkuar forcat për një bashkëpunim. “Shqiptar” mban titullin kënga e tyre, që në fakt nuk i përmbushi pritshmëritë e fansave.
Projekti numëron 10 milionë klikime, që edhe pse mund të cilësohen shumë për tregun tonë, nuk janë edhe aq shumë po t’i krahasojmë me projektet e tjera të reperëve që kanë arritur deri mbi 80 milionë klikime. Asokohe, fansat e dyshes mbetën të zhgënjyer nga teksti i këngës, duke u shprehur se prisnin shumë më shumë.
E pas dy vitesh, duket se Mozzik dhe Unikkatil mund të vijnë me një tjetër bashkëpunim. Mozzik ka publikuar dy Instastory, në njërën këngën ‘Shihemi n’përkujtime” pjesë e albumit ‘Kanuni i Katilit’ të reperit shumë të dashur nga publiku Unikkatil. Ndërsa në tjetrën, Mozzik ka ripostuar një fotografi të vjetër mes tij dhe Unikkatil.
Kjo i ka lënë fansat të mendojnë se ata mund të sjellin diçka së bashku. Vlen të përmendet se edhe Mozzik, edhe Loredana kanë shprehur gjithnjë admirimin për Unikkatil dhe madje kanë realizuar edhe koncerte së bashku.
Kështu, nëse Unikkatil do ishte pjesë e albumit të tyre “No rich parents”, nuk do përbënte ndonjë habi. Urojmë vetëm që këtë herë të përmbushin pritshmëritë e fansave.