Pak javë më parë Arbana Osmani u bë nënë për herë të tretë, teksa solli në jetë vajzën e saj, Zoin. Moderatoren e kemi parë shpesh të ndajë foto në rrjetet sociale me të bijën dhe dy djemtë këto ditë, megjithatë vetëm sot ajo ka gjetur mundësinë për të diskutuar me ndjekësit e saj, duke ju përgjigjur pyetjeve të tyre, kryesisht për shtatzëninë.
Një nga pyetjet që i është bërë më shpesh është ajo mbi kilogramët e shtuar gjatë pritjes së ëmbël, megjithatë Arbana tregohet e kujdeshme në përgjigjen e saj duke u shprehur:
“Atëherë kjo është pyetja më e shpeshtë, dhe deri tani e kam evituar përgjigjen, sepse nuk kam dashur të vë nën presion apo të bëj të ndjehen keq gra dhe vajza që gjatë shtatzënisë kanë përjetuar ndryshimin në peshë me stres.
Gjatë të tre shtatzënive të mia kam marrë rreth 10 kg. Jam kujdesur të ha shëndetshëm që nga dita e parë deri tek e fundit pasi përgjegjësia e rritjes së një krijese brenda meje ka qenë shumë e madhe dhe kam dashur të shkojë çdo gjë mirë.
Pas të treja lindjeve jam rikthyer në peshën e mëparshme , por jo në linjat e mëparshme. Që do të thotë barku është gjithmonë aty bashkë me celulitin. Rikthimi në formë prej vërteti kërkon kohë dhe sport dhe trajtime të cilat nuk kam as kohë as mundësi t’i bëj tani, kështu që nga trupi perfekt jemi larg. Por nuk mërzitemi se nuk është se kisha një trup modeleje para se të bëhesha me fëmijë.”
Ndërkohë në lidhje me përgjegjësinë dhe punën e shtuar tani si nënë e 3 vogëlushve, Arbana tha se e përballon me ndihmën e njerëzve të dashur, pa të cilët nuk di ç’do bënte.
Një nga pyetjet e tjera të shpeshta është ajo për mungesën e gjumit, por aspak diçka e re për mideratoren, që mesa duket i mungon prej 7 vitesh.
