Ashtu siç kishim mësuar më herët, Einxhel Shkira iu bashkua spektaklit te djeshëm, shtëpisë së “Big Brother VIP”. Para disa kohësh moderatorja i çuditi të gjithë kur tha se do të shpërngulej në Afrikë, për të jetuar e punuar atje. Asokohe, ajo tregoi se në kontinentin afrikan, ku qëndroi për pak kohë, po e mbante një projekt që s’kishte lidhje me jetën publike.
Por çfarë e riktheu Einxhelin në Shqipëri? Banorja më e re e shtëpisë ka treguar gjatë një bisede me banorët se arsyeja ishte pikërisht “Big Brother VIP”.
“Unë duhet të ikja në Afrikë, duhet të isha atje tani, por Vëllai i Madh më zuri”, tha Einxhel me humor, duke biseduar me Palomën dhe Kledin.
Ajo foli gjithashtu për lëvizjet e shpeshta në karrierë.
“Në fillimet e mia kam patur një emision timin muzikor hip-hopi, pastaj kam bërë hyrje-dalje”, tha Einxhel duke shtuar se është disi aventuriere, ose kërkon vazhdimisht diçka të re.
Bashkë me të, në “Big Brother VIP” hynë edhe dy bukuroshe të tjera, këngëtarja Beatrix Ramosaj, dhe blogerja Sara Berisha, të cilat banorët i pritën me entuziazëm.
