‘Top Channel’ ka hyrë në një periudhë të trazuar, pas afro tre viteve relativisht të qeta kur lajmet për largime ishin më të pakta në numër.
U nis me largimin e Drejtorit Ben Blushi në dhjetor dhe po vazhdon tutje.
Javën e kaluar, me shumë zhurmë u zyrtarizua mbyllja e “Top Story” në formatin ekzistues.
Në një rast të paprecedent, hapësira e lajmeve qendrore të Top Channel u vu në dispozicion të akuzave për gjobvënie ndaj drejtuesit të deritanishëm të formatit investigativ, Endrit Habilaj.
Të premten, u konfirmua edhe largimi i Eni Vasilit dhe emisionit të saj qendror politik “Open”, pas kthimit të Sokol Ballës. Por, largimet e zëvendësimet nuk mbarojnë me kaq!
Në një situatë që duket me efekt domino, rrugët me televizionin i ka ndarë edhe një prej prezantueseve të reja premtuese, Sidorela Gjoni.
Gjoni që dikur punonte në DigitAlb, spikati shpejt si gazetare terreni në lidhjet direkte për artikulimin dhe aftësitë e saj gjurmuese të lajmit veçanërisht gjatë tërmetit dhe pandemisë.
Si e tillë, ajo u shndërrua në fytyrën kryesore të Top News duke drejtuar disa emisione, përfshirë programin e përditshëm maratonë “Breaking” nga prilli i vitit të kaluar. E një javë pa i bërë një vit, edhe Sidorela është larguar.
Prezantimi i saj i fundit i “Breaking” ka qenë të hënën e kaluar, teksa sot “Breaking” ka nisur me prezantuese të re, Elisa Gjeranin dhe termin të ri të reduktuar, nga ora 09:00 deri në 12:00.
Për faktin se një javë programi mbeti pa drejtim, largimi duket të ketë qenë i befasishëm dhe me gjasë, me tension.
Largimet e njëpasnjëshme nga ‘garda e re’ gjatë kohës së fuqizimit dhe zgjerimit të programacionit të Top Media kanë krijuar me të drejtë pyetjen: kush e ka radhën?
https://www.instagram.com/p/Cb68kmFDkYo/
