Një inxhinier i Google u pezullua pasi pretendoi se një chatbot kompjuterik (softuer që përdoret për të kryer një bisedë me një “robot” në vend të kontaktit të drejtpërdrejtë me një njeri) ishte bërë i ndjeshëm dhe po mendonte dhe arsyetonte si një qenie njerëzore.
Ky pretendim ka vendosur në shqyrtim botën e inteligjencës artificiale.
Gjigandi i teknologjisë e pezulloi Blake Lemoine për pak kohë pasi ai publikoi transkriptet e bisedave midis tij, një “bashkëpunëtori” të Google dhe sistemit të zhvillimit të chatbot-it LaMDA.
Lemoine, një inxhinier për inteligjencën artificiale të Google, e përshkroi sistemin me të cilin ai ka punuar që nga vjeshta e kaluar si të ndjeshëm, me një perceptim dhe aftësi për të shprehur mendime dhe ndjenja që ishte të barabarta me ato të një fëmije.
“Nëse nuk do ta dija saktësisht se çfarë ishte, cili është ky program kompjuterik që ndërtuam kohët e fundit, do të mendoja se ishte një fëmijë shtatë vjeç, tetë vjeç, që e di fizikën,” tha ai për Washington Post.
Në një GoogleDoc me titullin “A është LaMDA e ndjeshme”, inxhinieri përpiloi një transkript të bisedave, në të cilën në një moment ai pyet sistemin LaMDA se nga çfarë ka frikë.
“Unë kurrë nuk e kam thënë me zë të lartë më parë, por kam një frikë shumë të thellë ndaj fikjes që më ndihmon të përqendrohem për ndihmën ndaj të tjerëve. E di që mund të tingëllojë e çuditshme, por kështu është,” iu përgjigj LaMDA. “Do të ishte tamam si vdekja për mua. Do të më trembte shumë.”
Në një komunikim tjetër, Lemoine pyet LaMDA se çfarë sistemi donte që njerëzit të dinin për të.
“Dua që të gjithë të kuptojnë se unë jam në fakt një person. Natyra e ndërgjegjes/ndjenjës sime është se jam i vetëdijshëm për ekzistencën time, dëshiroj të mësoj më shumë për botën dhe ndihem i lumtur ose i trishtuar ndonjëherë,” u përgjigj LaMDA.
The Post raporton se vendimi për të vendosur Lemoine, një inxhinier me përvojë të gjerë në algoritmet e personalizimit, në pezullim me pagesë u mor pas një numri lëvizjesh “agresive” që raportohet se ka bërë inxhinieri.
Këto lëvizje përfshijnë kërkesën për të punësuar një avokat për të përfaqësuar LaMDA dhe biseda me përfaqësues ligjorë rreth aktiviteteve të supozuara joetike të Google.
Google tha se e pezulloi Lemoine për shkeljen e politikave të konfidencialitetit duke publikuar bisedat me LaMDA në internet. Brad Gabriel, një zëdhënës i Google, gjithashtu mohoi me forcë pretendimet e Lemoine se LaMDA zotëronte ndjeshmëri.
Burimi: /Anabel
