*
Presidenti i Ukrainës Volodymyr Zelenskiy i ka listuar Këshillit të Sigurimit të OKB-së gjithë faktet rrënqethëse të mizorive që po bëhen në vendin e tij dhe i kërkoi që liderat rus të vendosen para drejtësisë për krime lufte. Zelenskiy bëri thirrje për një gjykatë ndërkombëtare të ngjashme me gjyqet e Nurembergut të nazistëve pas Luftës së Dytë Botërore, duke thënë për forcat ruse se “nuk ka asnjë krim të vetëm që ata nuk do ta kryenin atje”.
*
Prokurorët ukrainas thonë se po hetojnë rreth 5,000 krime të dyshuara ruse, pak pasi u zbuluan aktet mizore të kryera në qytetin ukrainas Bucha, ngjarje e cila nxiti perëndimin dhe SHBA të shtojnë sanksione të tjera kundër Rusisë.
*
Sipas shifrave të dhëna nga zyra e prokurorisë, gjithsej 4,468 krime të mundshme lufte u renditën si nën hetim që nga e marta, me shifrën që rritet çdo ditë. Rreth 165 fëmijë kanë humbur jetën gjithashtu si pasojë e pushtimit rus.
*
Presidenti ukrainas vuri në pikëpyetje aftësinë e Këshillit të Sigurimit të OKB-së për të ofruar siguri.
“Këshilli i Sigurimit i OKB-së ekziston dhe siguria në botë nuk ekziston. Për këdo. Tani Kievi është kryeqyteti i demokracisë globale, kryeqyteti i luftës për liri për të gjithë në kontinentin evropian.”- u shpreh kreu ukrainas gjatë fjalimit të tij të fundit.
*
Përfaqësuesja e të drejtave të njeriut në Ukrainë, Lyudmyla Denisova, tha se 150 deri në 300 trupa mund të jenë në një varr masiv pranë një kishe në qytetin e Bucha. Ndonëse kjo s’është ende e konfirmuar, satelitët kanë arritur të kapin imazhe në një nga rrugët e Bucha-s ku dukeshin shumë trupa të vendosur në po të njëjtin pozicion.
*
Sekretari amerikan i shtetit, Antony Blinken, tha se provat nga Bucha tregojnë “një fushatë të qëllimshme për të vrarë, për të torturuar, për të përdhunuar dhe për të kryer mizori” nga forcat ruse.
*
Nga ana tjetër, Kremlini thotë se pretendimet se forcat ruse kanë kryer krime lufte duke ekzekutuar civilë në Bucha janë një “falsifikim monstruoz” që synon “denigrimin” e ushtrisë ruse. Zëdhënësi i Kremlinit, Dmitry Peskov, u tha gazetarëve se deklaratat e presidentit amerikan Joe Biden që bënte thirrje që presidenti rus Vladimir Putin të gjykohej për krime lufte, ishin të papranueshme dhe të padenjë për një udhëheqës amerikan.
*
SHBA dhe Europa do të vendosin sanksione të reja kundër Rusisë që do të dëmtojnë edhe më ekonominë dhe stabilitetin rus.
*
Republika Çeke iu bashkua gjithashtu vendeve të tjera në furnizimin e drejtpërdrejtë të Ukrainës me armë sulmuese, duke u bërë vendi i parë i BE-së që e bën këtë që nga pushtimi i Rusisë në shkurt.
*
Tëitter njoftoi se do të bëjë publike masa të reja kundër llogarive të qeverisë ruse për të reduktuar ndikimin e propagandës zyrtare në rrjet.
Burimi: /The Guardian
